ಮೂಲ: CHILDREN
ಕವಿ: ಯೂಲ್ಯನ್ ಕೋನ್ಹಾವ್ಸ(ರ್), ಪೋಲಂಡ್ JULIAN KORNHAUSER, POLAND
ಕನ್ನಡ ಅನುವಾದ: ಎಸ್. ಜಯಶ್ರೀನಿವಾಸ ರಾವ್
ಮಕ್ಕಳು
ನಮಗಿಂತ ಜಾಣರು
ಎಲ್ಲಾ ಗೊತ್ತಿದೆ
ಏನಿಲ್ಲದರಲ್ಲೂ ಹಣ್ಣಿನ ಬಣ್ಣವಿದ್ದಂತೆ ಕಾಣಿಸುತ್ತೆ ಅವರಿಗೆ
ನಮಗೆ ಕಾಣಿಸದ ಮಲೆಗಳು ನೋಡುತ್ತಾರೆ
ಏನೂ ಕೇಳಿಸದಿದ್ದಾಗ ಕಡಲು ಅಪ್ಪಳಿಸುತ್ತೆ
ಅವರ ಓರೆಕೋರೆ ಹಲ್ಲುಗಳೆಡೆಯಿಂದ
ಯಾರಿಗೂ ಗೊತ್ತಿಲ್ಲದ ಪದಗಳು ಜಾರುತ್ತವೆ
ಕೊಳಕು ಉಗುರುಗಳಿಡಿಯಲ್ಲಿ ಭಯ ಮತ್ತು
ವರ್ಣಿಸಲಾಗದ ಸಾಹಸವೊಂದರ ಹೊಂಚು ಹುದುಗಿದೆ
ಅವರು ಓಡುವಾಗ
ಅವರ ಕಾಲಳತೆಮೀರಿದ ಚಪ್ಪಲಿಗಳು ಪಟಪಟಿಸುತ್ತವೆ
ಮತ್ತವರ ಕೂದಲು ಗಾಳಿಗೆ ನಿಮಿರಿರುತ್ತೆ
ಅವರು ಸುಮ್ಮನಿದ್ದಾಗ
ಅವರ ಕಂಗಳು ಅದೆಷ್ಟೋ ಪ್ರಾಯದ ಬಯಕೆಗಳನ್ನು ವ್ಯಕ್ತಪಡಿಸುತ್ತವೆ
ಅವರು ತುದಿಗಾಲಲ್ಲಿ ನಿಲ್ಲುವರು
ನಿಶಿದ್ಧವಾದದ್ದನ್ನು ಎಟುಕಲು
ಅವರು ಗುದ್ದಾಡುವರು ಕಟ್ಟಲೆಗಳೊಂದಿಗೆ
ತಮಾಷೆ ಮತ್ತು ಭಯದ ಮಧ್ಯೆ ಇರುವ
ಭೇದವನ್ನರಿಯಲು
ಕೆಲವೊಮ್ಮೆ ಅವರು ಶಾಂತವಾಗಿ ನೆಲದಲ್ಲಿ ಅಡ್ಡಾಗಿರುತ್ತಾರೆ
ವಿಚಿತ್ರ ಮಾಟಗಳನ್ನೊದರುತ್ತಿರುತ್ತಾರೆ
ಆಗ ಮೆಜಿನ ಮೇಲಿಂದ ಗಾಜಿನ ಲೋಟವೊಂದು ಕೆಳಬೀಳುತ್ತೆ
ಅವಕಾಶವೊಂದು ತಲೆಯೆತ್ತುತ್ತೆ
ಬಿಳಿ ಗೋಡೆಯ ಮೇಲೆ ಬಣ್ಣದ ಕಡ್ಡಿಯೊಂದು ಮೆಲ್ಲನೆ ಚಲಿಸಲಾರಂಭಿಸುತ್ತದೆ
*****
No comments:
Post a Comment