ಮೂಲ: SCRAPS OF BURNT PAPER
ಕವಿ: ರಿಶಾರ್ಡ ಕ್ರಿನಿತ್ಸ್ಕಿ RYSZARD KRYNICKI, Poland
Translated from the Polish into English by ALYSSA VALLES
ಕನ್ನಡಕ್ಕೆ: ಎಸ್ ಜಯಶ್ರೀನಿವಾಸ ರಾವ್
ಸುಟ್ಟ ಕಾಗದದ ಚೂರುಗಳು
ಸುಟ್ಟ ಕಾಗದದ ಆಕಾಶಕಾಯಗಳು
ರಸ್ತೆಯಲ್ಲಿ ಬೀಳುತ್ತಲಿವೆ:
ಕೆಲವೇ ವರ್ಷಗಳ ಅಥವಾ ಕೆಲವು ಸಾವಿರ ವರ್ಷಗಳ ಹಿಂದೆ
ನೀವು ಯೋಚಿಸಿರಬಹುದು
ಸ್ವರ್ಗವೂ ಕೂಡ ಸ್ಥಳದ ಅಭಾವದಿಂದ ಒದ್ದಾಡುತ್ತಿದೆ
ಹಾಗೆಯೇ, ಅದು ಆಗಿಂದಾಗ,
ಈ ಭೂಮಿಯಲ್ಲಿ ಆದಿಯಿಂದ ನಡೆದಾಡಿದ
ಪ್ರತಿಯೊಬ್ಬರ ಪ್ರತಿಯೊಂದು ಕೃತ್ಯವನ್ನು
ದಾಖಲಿಸಿರುವ ಕಡತಗಳನ್ನು
ಸುಡುತ್ತದೆ;
ಈಗ ನಿಮಗನಿಸುವುದನ್ನು
ನೀವು ಹಣೆಬರಹವೆಂದೋ ಅಥವಾ
ನಂಬಿಕೆಯ ಅಭಾವವೆಂದೋ ಕರೆಯಲಾಗದು.
No comments:
Post a Comment