ಹಿಂದಿ ಮೂಲ: ಕವಿ ಕಾ ಕಾಮ್ कवि का काम
KAVI KA KAAM
ಕವಿ: ರಾಕೇಶ್ ಮಿಶ್ರಾ ಸುಶೀಲ್
RAKESH (MISHRA) SUSHIL
ಕನ್ನಡ ಅನುವಾದ: ಎಸ್. ಜಯಶ್ರೀನಿವಾಸ ರಾವ್
ಕವಿಯ ಕಸುಬು
ಬಯಕೆಗಳು ಗಾಳಿಯಲ್ಲಿ ಈಜುವುದನ್ನು ನೋಡುತ್ತಾನೆ ಅಂವ
ಮಕ್ಕಳ ಆಟ ನೋಡುತ್ತಾ ಕದಿಯುತ್ತಾನೆ ಸ್ವಲ್ಪ ಬಾಲ್ಯವನ್ನು
ಶ್ಯಾಮವರ್ಣ ನಾರಿಯರ ಸ್ಮೃತಿಗಳಿಂದ ನಿರ್ಮಿಸುತ್ತಾನೆ ಒಂದು ಸಂಜೆಯನ್ನು
ಸ್ಮೃತಿಗಳನ್ನು ಕಾಪಾಡಲು ನಿರ್ಮಿಸುತ್ತಾನೆ
ಭಾಷೆಯೊಳಗೆ ಒಂದು ವಿಶಾಲವಾದ ಗೋದಾಮು
ನಾಪತ್ತೆಯಾದವರಿಗೆ ಬರೆಯುತ್ತಾನೆ ಪತ್ರಗಳನ್ನ
ತನ್ನ ಭಾಷೆಯ ಕವಿಗಳ ಸಮಾಧಿಗಳಿಗೆ ಹೋಗಿ ಓದುತ್ತಾನೆ ಫಾತೆಹಾ
ಅತೃಪ್ತ ಆತ್ಮಗಳಿಗಾಗಿ ಬೇಡುತ್ತಾನೆ ದುವಾ
ಯಾವುದೋ ನುರಿತ ಲೇಖಕನ ತರಹ
ಸಮಯದ ಬೆನ್ನ ಮೇಲೆ ಬರೆಯುತ್ತಾನೆ ಪ್ರಬಂಧಗಳನ್ನ
ಓದುತ್ತಾರೆ ಅವನ್ನು ಜನರು ಹೊಳೆಯುವ ಕಣ್ಗಳಿಂದ
ಅವನ ನಿಧನದ ನಂತರ
*****
No comments:
Post a Comment