ಪ್ರಪಾತ PRAPAATA - EWA LIPSKA'S 'PRECIPICE'

ಮೂಲ: PRECIPICE

ಕವಿ: ಏವಾ ಲೀಪ್ಸ್‌ಕ, ಪೋಲಂಡ್; EWA LIPSKA, Poland

Translated from the Polish into English by RYSZARD REISNER

ಕನ್ನಡ ಅನುವಾದ: ಎಸ್. ಜಯಶ್ರೀನಿವಾಸ ರಾವ್

 

ಪ್ರಪಾತ

  

ಮೃತರು ಯಾವಾಗಲೂ

ತಪ್ಪು ಸಮಯದಲ್ಲಿ

ಭೇಟಿ ಕೊಡುತ್ತಾರೆ.

 

ನಾವು ಸಿನಿಮಾ ನೋಡಲು ಹೊರಡುತ್ತಿರಬೇಕಾದರೆ.

ಡಿಸ್ಕೋತೆಕ್‌ಗೆ ಹೊರಡುತ್ತಿರಬೇಕಾದರೆ.

ಸೂಪರ್‌ಮಾರ್ಕೆಟ್‌ಗೆ ಹೊರಡುತ್ತಿರಬೇಕಾದರೆ.

 

ಮತ್ತೆ ಅವರು ತಮ್ಮ ಜತೆ ತರುತ್ತಾರೆ

ಗೋಡೆಗಳ ತುಂಡುಗಳನ್ನು.

ತಗಡಿನ ತುಣುಕುಗಳನ್ನು.

ನೋಯಿಸುವ ಮುಳ್ಳು ತಂತಿಯಲ್ಲಿ ಸುತ್ತಿ.

ಮತ್ತೆ ಅವರು ಚಿಂತಿತ ದನಿಯಲ್ಲಿ ಹೇಳುತ್ತಾರೆ:

“ಮೃತ್ಯುವೆಂಬುದು ಜೀವನವೇ ಅಲ್ವಾ... “

 

ಆದರೆ ಏನು ಮಾಡಲಿಕ್ಕಾಗುತ್ತೆ?

 

ನಾವು ನಮ್ಮ ಕೋಟುಗಳನ್ನು ಕಳಚಿ ನೇತುಹಾಕುತ್ತೇವೆ.

ಕಾಫಿ ಮಾಡುತ್ತೇವೆ.

 

ಬೋರ್ಬನ್ ವಿಸ್ಕಿಯ ಬಾಟಲೊಂದನ್ನು

ತೆರೆದು ಇಬ್ಬರೂ ನೋಡುತ್ತೇವೆ

ನೇರ

ಪ್ರಪಾತದೊಳಕ್ಕೆ.

***** 

ಮುಖಾಮುಖಿ MUKHAMUKHI - CZESLAW MILOSZ'S "ENCOUNTER"

ಮೂಲ: ENCOUNTER

ಕವಿ: ಚೆಸ್‌ವಾಫ಼್ ಮಿವಾಶ್, ಪೋಲಂಡ್; Czesław Miłosz, Poland 

Translated from the original Polish by Czesław Miłosz and Lillian Vallee

ಕನ್ನಡಕ್ಕೆ: ಎಸ್ ಜಯಶ್ರೀನಿವಾಸ ರಾವ್

 

ಮುಖಾಮುಖಿ

 

ಪಯಣಿಸುತ್ತಿದ್ದೆವು ನಾವು ನಸುಕಿನಲಿ ಹಿಮಗಟ್ಟಿದ ಬಯಲುಗಳ ಮೇಲೆ ಬಂಡಿಯಲಿ.

ರೆಡ್‌ವಿಂಗ್ ಹಕ್ಕಿಯೊಂದು ಹಾರಿತು ಮೇಲಕೆ ಕತ್ತಲೆಯಲಿ.

 

ಅಚಾನಕ್ಕಾಗಿ ಮೊಲವೊಂದು ಧಾವಿಸಿತು ರಸ್ತೆಗೆ ಅಡ್ಡನೆ.

ಕೈತೋರಿಸಿದ ನಮ್ಮಲ್ಲೊಬ್ಬ ಅದರ ಕಡೆ.

 

ಬಹು ಕಾಲದ ಹಿಂದಿನ ಮಾತದು.  ಇಂದು ಅವರೀರ್ವರೂ ಬದುಕಿಲ್ಲ,

ಮೊಲವೂ ಇಲ್ಲ, ಕೈತೋರಿಸಿದವನೂ ಇಲ್ಲ.

 

ಓ ಪ್ರಿಯೇ, ಎಲ್ಲಿದ್ದಾರವರು, ಎಲ್ಲಿ ಹೋಗುತ್ತಿದ್ದಾರವರು,

ಆ ಕೈಬೀಸಿನ ಝಳಪು, ಆ ಮಿಂಚಿನ ಓಟ, ಬೆಣಚುಕಲ್ಲುಗಳ ಮರ್ಮರ.

ಕೊರಗಿನಿಂದ ಕೇಳುತ್ತಿಲ್ಲ ನಾನು, ಬೆರಗಿನಿಂದ.

 

*****

THREE COLOURS OF LAUGHTER - BHUVANA HIREMATH'S 'MOORU BANNADA NAGU' ಮೂರು ಬಣ್ಣದ ನಗು

Kannada original: MOORU BANNADA NAGU ಮೂರು ಬಣ್ಣದ ನಗು

Poet: BHUVANA HIREMATH

English Translation: S. Jayasrinivasa Rao

THREE COLOURS OF LAUGHTER

 

Three colours of laughter

in the maelstrom behind 

the curtain in that kitchen

four kinds of tears

in the hot breaths

of that forest-fire 

on the mountain-side

five kinds of silences

in the throat 

of the straight-necked crane

on that quiet river

 

three types of snore-sounds

on that island 

behind that new heaven

four shades of dreams

behind the glow

of that table lamp

five fingers of time

while arising after 

shaking off that love

 

Chirping birds evoke wonder

our heritage evokes wonder

oh, wonder ... arise

arise ... arise ... arise ...

 

Life is a bad habit stuck to the skin

Live away

***** 

ಅದೇನೇ ಆದರೂ ಪುಸ್ತಕಗಳು ADE:NE: AADARU: PUSTAKAGALU - CZESŁAW MIŁOSZ's "AND YET THE BOOKS"

ಮೂಲ: AND YET THE BOOKS

ಕವಿ: ಚೆಸ್‌ವಾಫ಼್ ಮಿವಾಶ್, ಪೋಲಂಡ್ CZESŁAW MIŁOSZ, Poland

Translated from the original Polish by Czesław Miłosz and Robert Hass

ಕನ್ನಡ ಅನುವಾದ: ಎಸ್ ಜಯಶ್ರೀನಿವಾಸ ರಾವ್

 

ಅದೇನೇ ಆದರೂ ಪುಸ್ತಕಗಳು

 

ಅದೇನೇ ಆದರೂ ಪುಸ್ತಕಗಳು ಶೆಲ್ಫುಗಳ್ಳಲೇ ಇರುತ್ತಾವೆ, ತನೀ ಜೀವಿಗಳು,

ಕಾಣಿಸಿಕೊಂಡವು ಒಮ್ಮೆ ಅವು, ಶರತ್ಕಾಲದಲ್ಲಿ ಮರದಡಿಯಲ್ಲಿ, 

ಹೊಳೆಯುವ ಚೆಸ್ಟ್‌ನಟ್‌ಗಳಂತೆ ಇನ್ನೂ ಒದ್ದೆಯಾಗಿಯೇ ಇದ್ದವು,

ತಡವಿದಾಗ, ಲಾಲಿಸಿದಾಗ, ಜೀವ ಬಂತು ಅವಕ್ಕೆ,

ಬಾನಂಚಿನ ಬೆಂಕಿಗಳು, ಸಿಡಿದೊಡೆದ ಕೋಟೆಮನೆಗಳು,

ಭರನಡಿಗೆಯಲ್ಲಿರುವ ಕುಲಗಳು, ತಿರುಗುತ್ತಿರುವ ಗೃಹಗಳು,

ಇವುಗಳೆಲ್ಲದರ ಹೊರತಾಗಿಯೂ ಜೀವ ಬಂತು ಅವಕ್ಕೆ.

“ನಾವು ಇದ್ದೇವೆ,” ಎಂದಂದವು ಅವು, 

ಅವುಗಳ ಹಾಳೆಗಳನ್ನು ಹರಿದೆಸೆಯುತ್ತಿದ್ದಾಗ, 

ಝೇಂಕರಿಸುವ ಜ್ವಾಲೆಯೊಂದು 

ಅವುಗಳ ಅಕ್ಷರಗಳನ್ನು ನೆಕ್ಕುತ್ತಿದ್ದಾಗ.  

ನಮಗಿಂತ ಅದೆಷ್ಟೋ ಬಾಳಿಕೆ ಉಳ್ಳವು ಅವು,

ನಮ್ಮ ದುರ್ಬಲ ಉಷ್ಣತೆ ನೆನಪನ್ನು ತಣ್ಣಗಾಗಿಸುತ್ತೆ, ಚದುರಿಸುತ್ತೆ, ನಾಶಿಸುತ್ತೆ.

ನಾನಿಲ್ಲದಿರುವಾಗಿನ ಭೂಮಿಯನ್ನು ಮನದಲ್ಲಿ ಚಿತ್ರಿಸಿಕೊಳ್ಳುವೆ:

ಏನೂ ಆಗುತ್ತಿಲ್ಲ, ನಷ್ಟವೂ ಇಲ್ಲ, ಒಂದು ವಿಚಿತ್ರ ಪ್ರದರ್ಶನವೇ ಎಂದೂ,

ಹೆಣ್ಣುಗಳ ಉಡುಪುಗಳು, ಇಬ್ಬನಿ ಹನಿದ ನೀಲಕಗಳು, ಕಣಿವೆಯಲ್ಲಿಯ ಹಾಡೊಂದು,

ಅದೇನೇ ಆದರೂ ಪುಸ್ತಕಗಳು ಶೆಲ್ಫುಗಳ್ಳಲೇ ಇರುತ್ತಾವೆ, 

ಸದ್‌ಜನ್ಮ ಪಡೆದ, ಮನುಜರಿಂದ, ಅಲ್ಲದೇ ಕಾಂತಿಯಿಂದಲೂ, 

ಶಿಖರಗಳಿಂದಲೂ ಸಹ ವ್ಯುತ್ಪನ್ನವಾದ ಪುಸ್ತಕಗಳು. 

*****

ತಡೆಗಟ್ಟನ್ನು ಏರಿಸುತ್ತಿದ್ದಾಗ TADEGATTANNU E:RISUTTIDAAGA - ANNA SWIRSZCZYNSKA's "WHILE BUILDING THE BARRICADE"

ಮೂಲ: WHILE BUILDING THE BARRICADE

ಕವಿ: ಆನ್ನಾ ಶ್ವೆರ್ಶಚಿನ್ಸ್‌ಕಾ, ಪೋಲಂಡ್ ANNA SWIRSZCZYNSKA, POLAND

Translated from the Polish into English by CZESLAW MILOSZ AND LEONARD NATHAN

ಕನ್ನಡ ಅನುವಾದ: ಎಸ್ ಜಯಶ್ರೀನಿವಾಸ ರಾವ

ತಡೆಗಟ್ಟನ್ನು ಏರಿಸುತ್ತಿದ್ದಾಗ

 

ಹೆದರಿದ್ದೆವು ನಾವು ತಡೆಗಟ್ಟನ್ನು ಏರಿಸುತ್ತಿದ್ದಾಗ

ಗುಂಡಿನ ಸುರಿಮಳೆಯ ಮಧ್ಯೆ

 

ಶರಾಬಿನಂಗಡಿಯಂವ, ರತ್ನಗಾರನ ಪ್ರೇಯಸಿ, ಕ್ಷೌರಿಕ

ಹೇಡಿಗಳು ನಾವೆಲ್ಲರೂ

ಮನೆಗೆಲಸದಾಕೆ ನೆಲಕ್ಕೆ ಬಿದ್ದಳು

ಹಾಸುಗಲ್ಲೊಂದನ್ನು ಎತ್ತೆಳೆಯುವಾಗ, 

ಬಹಳವೇ ಹೆದರಿದ್ದೆವು ನಾವೆಲ್ಲರೂ

ಹೇಡಿಗಳು ನಾವೆಲ್ಲರೂ

ಪಾರುಪತ್ಯಗಾರ, ಅಂಗಡಿಯವಳು, ಪಿಂಚಣಿದಾರ

 

ಔಷದಿಯಂಗಡಿಯಂವ ನೆಲಕ್ಕೆ ಬಿದ್ದ

ಶೌಚಾಲಯದ ಬಾಗಿಲನ್ನು ಜಗ್ಗುತ್ತ ಎಳೆಯುವಾಗ

ನಾವು ಇನ್ನೂ ಹೆದರಿದೆವು, ಕಳ್ಳಸಾಗಣೆಯವಳು

ಟೆಯ್ಲರು, ಟ್ರಾಮ್ ಡ್ರೈವರು,

ಹೇಡಿಗಳು ನಾವೆಲ್ಲರೂ

 

ಸುಧಾರಣಾ ಶಾಲೆಯ ಹುಡುಗನೊಬ್ಬ ಕೆಳಬಿದ್ದ

ಮಣ್ಣಿನಚೀಲವೊಂದನ್ನು ಎಳೆಯುವಾಗ,

ನಾವು ನಿಜಕ್ಕೂ ಹೆದರಿದ್ದೆವು ನೋಡಿ

 

ಯಾರೂ ನಮ್ಮನ್ನು ಬಲವಂತಮಾಡಲಿಲ್ಲವಾದರೂ

ನಾವು ತಡೆಗಟ್ಟನ್ನು ಏರಿಸಿದೆವು

ಗುಂಡಿನ ಸುರಿಮಳೆಯ ಮಧ್ಯೆ

*****

ಸಣ್ಣ ಕವನಗಳು - LITTLE POEMS - RYSZARD KRYNICKI

ಸಣ್ಣ ಕವನಗಳು

LITTLE POEMS

ಕವಿ: ರಿಶಾರ್ಡ ಕ್ರಿನಿತ್‌ಸ್ಕಿ, ಪೋಲಂಡ್ RYSZARD KRYNICKI, Poland

Translated from the Polish into English by ALYSSA VALLES

ಕನ್ನಡಕ್ಕೆ: ಎಸ್ ಜಯಶ್ರೀನಿವಾಸ ರಾವ್

ಬುದ್ಧ, ಏಸು

 

ಬುದ್ಧನೇ, ಏಸುವೇ,

ವ್ಯರ್ಥವೇ ನೀವು ಅಡಗಿರುವಿರಿ

ಇಷ್ಟೊಂದು ಅವತಾರಗಳಲ್ಲಿ

ಹೃದಯದಂತೆ

 

ಅವಸರವಸರದ ಓಟ ಎತ್ತ ಕಡೆ, ನನ್ನ ಬಡಪಾಯಿ ಹೃದಯವೇ, 

ನೀನಿನ್ನೂ ನಿನ್ನದೇ ಅವತಾರದ ಹುಡುಕಾಟದಲ್ಲಿದ್ದಂತೆ 

ಮೋಡಗಳು

 

ಮೋಡಗಳು ನಮ್ಮ ಮೇಲೆ ತೇಲಿಕೊಂಡು ಹೋಗುತ್ತಿರುತ್ತವೆ – 

ಗೋಚರವಾಗಿ ಅಗೋಚರವಾಗಿ,

ಏನ ಕಂಡರೂ ಯಾರ ಕಂಡರೂ 

ಅವು ಅಚ್ಚರಿಗೊಳ್ಳುವುದಿಲ್ಲ 

ಪದಗಳು ಇವೆ ಕೆಲವು

 

ಪದಗಳು ಇವೆ ಕೆಲವು, ಅವು ನಮ್ಮ ಬಾಯಿಗಳಲ್ಲಿ ಹುಚ್ಚಾಬಟ್ಟೆ ಹಬ್ಬಿ,

ಬೇರೇನೂ ಮಾಡಲ್ಲ ಬರೀ ನಮ್ಮ ರಕ್ತ ಹೀರುತ್ತಾವಷ್ಟೇ

ನನ್ನಿಂದಾಗದು ನಿನ್ನ ಸಹಾಯ

 

ಪಾಪದ ಪತಂಗವೇ, ನನ್ನಿಂದಾಗದು ನಿನ್ನ ಸಹಾಯ,

ದಿಪವ ಆರಿಸಬಲ್ಲೆನಷ್ಟೇ. 

I Can’t Help You

Poor moth, I can’t help you,
I can only turn out the light.

ಮೂಲಭೂತ ಬಿಕ್ಕಟ್ಟುಗಳು MOOLABHOOTA BIKKATTUGALU - JULIAN KORNHAUSER'S 'FUNDAMENTAL DIFFICULTIES'

ಮೂಲ: FUNDAMENTAL DIFFICULTIES

ಕವಿ: ಯೂಲ್ಯನ್ ಕೋನ್‌ಹಾವ್ಸ(ರ್), ಪೋಲಂಡ್ JULIAN KORNHAUSER, POLAND

ಕನ್ನಡ ಅನುವಾದ: ಎಸ್. ಜಯಶ್ರೀನಿವಾಸ ರಾವ್

 

ಮೂಲಭೂತ ಬಿಕ್ಕಟ್ಟುಗಳು

 

ಕವನವೆಂದರೇನು ಸರಳ ಯೋಚನೆಯೊಂದಕ್ಕೆ ತೊಟ್ಟಿಲು

ಕಾಣದ ಗುಡ್ಡದ ಮೇಲೆ ಹಳದಿ ಬಣ್ಣದ ಕೋಟೆಮನೆ 

ಗಾಳಿ ಎಗರಿಸಿಕೊಂಡ ಮಾಸಿದ ಕಾಗದದ ಹಾಳೆ

ಕವನವೆಂದರೇನು ನೆನಪಿನ ರಬ್ಬರ್ ಸ್ಟಾಂಪ್

ಶಸ್ತ್ರಾಗಾರದ ನಕಾಶೆ ಅವಸರದ ಉಸಿರು

ಅವಿವೇಕಿ ಕ್ಷಣವೊಂದರ ಮಿನುಗು

ನಿಜವಾಗಿಯೂ ಗೊತ್ತಿಲ್ಲ ನನಗೆ 

ಗೊತ್ತಿಲ್ಲ ನನಗೆ ಕವನಗಳು ಇನ್ನೂ ಅಜೀವವೇ ಎಂದು

ಜೀವಿಸಲು ಸಹಾಯ ಮಾಡುತ್ತಾವೆಯೇ ಎಂದು

*****